2024 ഒക്‌ടോബർ ഒന്ന് ആദായനികുതി ദായകരെ സംബന്ധിച്ച് ഏറെ പ്രധാനപ്പെട്ടതാണ്. 2024- 25 ബജറ്റിൽ ധനമന്ത്രി നിർമ്മല സീതാരാമൻ പ്രഖ്യാപിച്ച നിരവധി നിർദ്ദേശങ്ങൾ ഇന്നു മുതൽ പ്രാബല്യത്തിൽ വരികയാണ്. നികുതിദായകർ അറിഞ്ഞിരിക്കേണ്ട ആറ് പ്രധാന മാറ്റങ്ങളാണു താഴെ നൽകുന്നത്.
ആധാർ എന്റോൾമെന്റ് ഐഡി നിർത്തലാക്കൽ
ഇന്നലെ വരെ നികുതി കാര്യങ്ങളിൽ ആധാർ നമ്പറിന് പകരം ആധാർ എന്റോൾമെന്റ് ഐഡി ഉപയോഗിക്കാൻ സർക്കാർ അനുമതി ഉണ്ടായിരുന്നു. എന്നാൽ ഇന്നു മുതൽ ഇതു സാധ്യമാകില്ല. ആധാറുമായി ബന്ധപ്പെട്ട എല്ലാ റഫറൻസുകളും സുരക്ഷിതമാണെന്ന് സർക്കാർ നികുതിദായകർക്ക് ഉറപ്പുനൽകുന്നു.
ടിഡിഎസ് യുക്തിസഹമാക്കൽ
ഇന്ന് മുതൽ ടിഡിഎസ് നിരക്കുകൾ ഗണ്യമായി പരിഷ്‌കരിക്കും. ചില വിഭാഗങ്ങൾക്ക് ടിഡിഎസ് നിരക്ക് 5% ൽ നിന്ന് 2% ആയി കുറയും. നിലവിൽ 20% ടിഡിഎസ് ചുമത്തുന്ന സെക്ഷൻ 194 എഫ് പൂർണമായും ഒഴിവാക്കപ്പെടും. ഇതു നികുതിദായകർക്കുള്ള നികുതി കിഴിവുകൾ ലളിതമാക്കും.
ഫ്‌ലോട്ടിംഗ് റേറ്റ് സേവിംഗ്‌സ് ബോണ്ടുകളുടെ നികുതി
2020 ലെ ഫ്‌ലോട്ടിംഗ് റേറ്റ് സേവിംഗ്‌സ് ബോണ്ടുകളും (നികുതി നൽകേണ്ടവ), മറ്റേതെങ്കിലും സർക്കാർ സെക്യൂരിറ്റികളും ഒരു സാമ്പത്തിക വർഷത്തിൽ 10,000 രൂപയിൽ കൂടുതലായാൽ നികുതി കിഴിവുകൾക്ക് വിധേയമായിരിക്കും. സുതാര്യത വർദ്ധിപ്പിക്കുക, ഉയർന്ന വരുമാനക്കാർ നികുതി വരുമാനത്തിൽ ഉചിതമായ സംഭാവന നൽകുന്നുവെന്ന് ഉറപ്പാക്കുക എന്നീ ലക്ഷ്യങ്ങളാണ് ഈ നടപടികൾക്കുള്ളത്.
ഫ്യൂച്ചർ ആൻഡ് ഓപ്ഷൻസ് എസ്ടിടി
ഫ്യൂച്ചറുകൾക്കും ഓപ്ഷനുകൾക്കുമുള്ള സെക്യൂരിറ്റീ ട്രാൻസാക്ഷൻ നികുതി (എസ്ടിടി) വർദ്ധിപ്പിക്കാൻ സർക്കാർ നിർദ്ദേശിച്ചിട്ടുണ്ട്. ഫ്യൂച്ചറുകൾക്കുള്ള എസ്ടിടി ഇനി മുതൽ 0.02% ആയിരിക്കും. അതേസമയം ഓപ്ഷനുകളുടേത് 0.1% ആകും. ഊഹക്കച്ചവട വ്യാപാര പ്രവർത്തനങ്ങളിൽ നിന്നുള്ള വരുമാനം വർദ്ധിപ്പിക്കുക എന്ന ലക്ഷ്യമാണ് സർക്കാരിനുള്ളത്.
ഓഹരി ബൈബാക്കുകൾക്ക് നികുതി
ഓഹരി തിരികെ വാങ്ങലിലൂടെ ലഭിക്കുന്ന വരുമാനത്തിന് സ്വീകർത്താവ് ഇനി മുതൽ നികുതി നൽകണം. ഓഹരി തിരികെ വാങ്ങലുകൾ നിക്ഷേപകരുടെ കൈയ്യിൽ വരുമാനം എത്തിക്കുന്നുവെന്നും, ഇത്തരം നേട്ടങ്ങൾക്ക് നികുതി നൽകേണ്ടതുണ്ടെന്നും സർക്കാർ വ്യക്തമാക്കുന്നു.
വിവാദ് സേ വിശ്വാസ് (DTVSV) സ്‌കീം
ഇന്ന് മുതൽ പ്രാബല്യത്തിൽ വരുന്ന DTVSV സ്‌കീം നികുതിദായകർക്ക് നികുതി വകുപ്പുമായുള്ള തർക്കങ്ങൾ പരിഹരിക്കുന്നതിന് ഒരു ചട്ടക്കൂട് നിർദേശിക്കുന്നു. പഴയ അപ്പീലുകളെ അപേക്ഷിച്ച് കുറഞ്ഞ സെറ്റിൽമെന്റ് തുകയിൽ പുതിയ അപ്പീലുകൾ സാധ്യമാകും. 2024 ഡിസംബർ 31-ന് മുമ്പ് ഡിക്ലറേഷൻ ഫയൽ ചെയ്യുന്ന നികുതിദായകർക്ക് പിന്നീട് ഫയൽ ചെയ്യുന്നവരെ അപേക്ഷിച്ച് സെറ്റിൽമെന്റ് തുക കുറയും.
(മുകളിൽ പറഞ്ഞ കാര്യങ്ങൾ നിലവിൽ ലഭ്യമായ റിപ്പോർട്ടുകൾ പ്രകാരമാണ്. കൂടുതൽ വിവരങ്ങൾക്ക് ആദായനികുതി വകുപ്പുമായി ബന്ധപ്പെടുക.)